दि. 04 डिसेंबर 2025, मुडझा
मुख्यमंत्री समृद्ध पंचायत राज अभियानाच्या माध्यमातून गावागावांच्या शाश्वत विकासाला नवे बळ मिळत असताना मुडझा गावाने आज एक प्रेरणादायी उदाहरण घालून दिले. ग्रामस्थांच्या सामूहिक श्रमदानातून गावातील नव्या बंधाऱ्याचे बांधकाम करण्यात आले.
गावाच्या सर्वांगीण प्रगतीसाठी आणि पाण्याच्या संवर्धनासाठी महत्त्वपूर्ण असलेल्या या उपक्रमात आनंदाबाई कुंभारे हायस्कूलचे विद्यार्थी, शिक्षक तसेच ग्रामपंचायतीचे पदाधिकारी मोठ्या उत्साहाने सहभागी झाले. ग्रामीण विकास विभागाच्या मार्गदर्शनाखाली आणि स्थानिक ग्रामपंचायतीच्या पुढाकाराने हा उपक्रम अत्यंत यशस्वीरीत्या पार पडला.
पावसाचे पाणी साठवणे, शेतीसाठी पाण्याची उपलब्धता वाढविणे आणि भूजलस्तर उंचावणे या प्रमुख उद्दिष्टांसाठी उभारण्यात आलेल्या या बंधाऱ्यामुळे आगामी काळात गावाच्या जलव्यवस्थापनात सकारात्मक बदल होणार आहेत.
कार्यक्रमात ग्रामपंचायत सदस्य रामदास सुरपाम, राकेश लोणारकर, ग्रामपंचायत अधिकारी मुरलीधर मेश्राम, प्रमोद उमरगुंडावार, भर्रे , बोरीकर, झाडे, पुरुषोत्तम सुरपाम, पुरुषोत्तम मेश्राम, अजित गोवर्धन यांच्यासह शाळेचे विद्यार्थी मोठ्या संख्येने उपस्थित होते.
खेड्यापाड्यांत राबविण्यात येणारे असे श्रमदान उपक्रम ग्रामीण विकासाला मजबूत दिशा देत असून समाजातील एकजुटीचे तसेच शाश्वत विकासाचे उत्तम उदाहरण ठरत आहेत.
0 Comments